ახალშობილთა და ჩვილ ბავშვთა კრიტიკული მედიცინის განყოფილება ნებისმიერი სირთულის პედიატრიულ პაციენტებს მართავს, რაც გულისხმობს დღენაკლული, უკიდურესად უმწიფარი ახალშობილების მკურნალობასა და გამოზრდას. ასევე, განყოფილებაში წარმატებით ხორციელდება დროული ახალშობილების თანდაყოლილი თუ შეძენილი პათოლოგიების, მათ შორის - იშვიათი დაავადებების მკურნალობა საერთაშორისო პრაქტიკისა და გაიდლაინების თანახმად.
განყოფილების უნიკალურობა განპირობებულია იაშვილის კლინიკის მაღალპროფესიული, მულტიდისციპლინური გუნდით, რაც უზრუნველყოფს განსაკუთრებით რთული სამედიცინო შემთხვევების მართვას.
ახალშობილთა და ჩვილ ბავშვთა კრიტიკული მედიცინის განყოფილება გაშლილია 42 საწოლზე და აღჭურვილია საერთაშორისო სამედიცინო სტანდარტების შესაბამისად, რაც გულისხმობს სრულფასოვან ინფრასტრუქტურულ და აპარატურულ მოწყობას შესაძლო გართულებებთან ასოცირებული რისკების მაქსიმალურად შემცირების მიზნით.
განყოფილება წარმოდგენილია მაღალკვალიფიციური სამედიცინო (როგორც საექთნო, ასევე -საექიმო) კადრებით. მედპერსონალი ჩართულია უწყვეტი სამედიცინო განათლების სისტემაში და უწყვეტ რეჟიმში გადის სტაჟირებას სხვადასხვა ევროპულ და ამერიკულ კლინიკაში. განყოფილების მაღალტექნოლოგიური გარემო და მაღალკვალიფიციური სამედიცინო პერსონალი სხვადასხვა სირთულის ნოზოლოგიების წარმატებული მართვის შესაძლებლობას იძლევა.
შესაბამისად, კლინიკაში ხორციელდება მაღალი რისკის მქონე, დღენაკლული და დროული ახალშობილების როგორც თერაპიული, ასევე - თანდაყოლილი მალფორმაციების ქირურიული მკურნალობა და პოსტქირურგიული მართვა. მათ შორის:
• დღენაკლული, განსაკუთრებით უმწიფარი ახალშობილების მკურნალობა და გამოზრდა;
• თავისა და ზურგის ტვინის თანდაყოლილი განვითარების მანკებისა და სიმსივნეების მკრუნალობა;
• თავის ტვინის სისძლძარღვოვანი პათოლოგიების მკურნალობა;
• თანდაყოლილი და შეძენილი ჰიდროცეფალიის მკურნალობა;
• თავის ქალას განვითარების მანკების, მათ შორის - რთული ფორმის კრანიოსინოსტოზის მკურნალობა;
• სასუნთქი სისტემის თანდაყოლილი მანკების ქირურგიული მკურნალობა;
• საჭმლის მომნელებელი სისტემის თანდაყოლილი მალფორმაციების თერაპიული და ქირურგიული მკურნალობა;
• საშარდე და სასქესო სისტემის თანდაყოლილი პათოლოგიების მართვა;
• იშვიათი, გენეტიკური, მეტაბოლური დარღვევებით მიმდინარე პათოლოგიების მართვა;
იაშვილის ბავშვთა საავადმყოფოს გადაუდებელი მედიცინის განყოფილება რეგიონში მოქმედი ერთ-ერთი ყველაზე მძლავრი სერვისია ურგენტული დახმარების საჭიროების მქონე პედიატრიული პაციენტებისთვის. განყოფილება უახლესი თაობის სამედიცინო აპარატურით არის აღჭურვილი, ინფრასტრუქტურულად გამართულია და მომხმარებლების კომფორტზე მაქსიმალურადაა მორგებული, რაც სამედიცინო დაწესებულებასთან პირველი შემხებლობით გამოწვეული სტრესისგან თავისუფალ გარემოს ქმნის.
გადაუდებელი დახმარების განყოფილება აერთიანებს 12 ობსერვაციულ და შოკის 3 საწოლს და 24 საათიან, სრულფასოვან მულტიპროფილურ მომსახურებას უწევს 28 დღიდან 18 წლამდე ასაკის პედიატრიულ პაციენტებს. წარმატებით ხორციელდება მაღალი სირთულის სომატური, ტრავმული და მწვავე ინტოქსიკაციების მკურნალობა. პროცესში ექიმების მულტიპროფილური გუნდი ერთვება და თითოეულ პაციენტს ინდივიდუალურად, საჭიროებისამებრ მართავს.
განყოფილება აღჭურვილია ულტრათანამედროვე სამედიცინო აპარატურით. ხელმისაწვდომია კომპიუტერული ტომოგრაფია, რენტგენოლოგიური, ენდოსკოპიური და ულტრაბგერითი კვლევები. 24/7-ზეა ხელმისაწვდომი ასევე ლაბორატორიული გამოკვლევები.
აღსანიშნავია, რომ იაშვილის ბავშვთა საავადმყოფო ერთადერთი მე-3 დონის რეფერალური პედიატრიული სამედიცინო ცენტრია ქვეყანაში და ნებისმიერი სირთულის დაავადებებსა და ტრავმულ დაზიანებებს მართავს.
მოზრდილ ბავშვთა ანესთეზიისა და კრიტიკული მედიცინის განყოფილება კრიტიკულად მძიმე 28 დღიდან 18 წლამდე ასაკის პედიატრიულ პაციენტებს სრულფასოვან სამედიცინო მომსახურებას უწევს. სამედიცინო პერსონალი, მათ შორის ექიმები და ექთნები მკურნალობისა და მართვის პროცესში გუნდურად იღებენ მონაწილეობას. აღნიშნული მიმართულებით ხელმისაწვდომია:
• პედიატრიული ანესთეზია, რომელიც გულისხმობს ტკივილის ოპტიმალურ მართვას თანამედროვე მედიკამენტების მორგებული დოზირების გამოყენებით ქირურგიული პროცედურებისას თუ მათ შემდგომ;
• კრიტიკული პედიატრიული პაციენტების რეანიმაცია (PICU), რაც კრიტიკულად მძიმე მდგომარეობაში მყოფი პაციენტების ინტენსიურ მონიტორინს და გამოჯანმრთელებისთვის საჭირო თანამედროვე პროცედურებს მოიცავს;
• ტკივილის მართვის სერვისი, რაც აერთიანებს ფარმაკოლოგიურ და არაფარმაკოლოგიურ ინტერვენციებს უნიკალური საჭიროებების მიხედვით;
• წინასაოპერაციო შეფასება, პოსტოპერაციული მართვა, ურგენტული მდგომარეობების მართვა,
განყოფილება აღჭურვილია თანამედროვე სამედიცინო აპარატურით და ინფრასტრუქტურით და წარმატებით მართავს ისეთ კრიტიკულ მდგომარეობებს, რომლებიც შემდეგი სახის პოლიპროფილური დაავადებების შედეგადაა გამოწვეული: სასუნთქი სისტემის დაზიანებები, მწვავე ლეიკემია, მწვავე და ქრონიკული ნევროლოგიური დაავადებები, პოლიტრავმები (ნეიროტრავმები, აბდომინური და თირკლმის ტრავმული დაზიანებები), თანდაყოლილი მეტაბოლური დარღვევები, იშვიათი დაავადებები და მრავალი სხვა.
ასევე, განყოფილებაში წარმატებით ხორციელდება თირკმლის ჩანაცვლებითი თერაპია (პერიტონეალური და ჰემოდიალიზი) თირკმლის მწვავე უკმარისობის დროს, გენური მუტაციით განპირობებული სიცოცხლისთვის შეუთავსებელი მდგომარეობების მართვა, ნეიროქირურგიული პაციენტების ინტრაკრანიალური წნევის მონიტორინგი და მრავალი სხვა.
რესპირაციული და აბდომინური მედიცინის განყოფილება სასუნთქი სისტემისა და მუცლის ღრუს ორგანოთა დაავადებების დიაგნოსტიკა-მკურნალობას უზრუნველყოფს და 28-დღიდან 18 წლამდე ასაკის პაციენტებს სრულფასოვან მომსახურებას აწვდის. კლინიკა ერთადერთია ქვეყანაში, რომელიც აღნიშნული პროფილით პედიატრიულ პაციენტებს ნებისმიერი სახის დაავადების მართვას ქვეყნიდან გაუსვლელად სთავაზობს.
რესპირაციული მიმართულებით დიაგნოსტიკა/მკურნალობა ეფუძნება როგორც ეროვნულ პროტოკოლებს, ასევე - ევროპის რესპირაციული საზოგადოებისა და ამერიკის თორაკალური საზოგადოების რეკომენდაციებს. წარმატებით ხორციელდება ისეთი დაავადებების მკურნალობა, როგორიცაა:
• მწვავე რესპირაციული ინფექციები, მათ შორის - ბაქტერიული და ვირუსული ინფექციები;
• სუნთქვის მწვავე უკმარისობით მიმდინარე დაავადებები;
• ქრონიკული რესპირაციული დაავადებები (ბრონქული ასთმა, ქრონიკული ბრონქიტი, ა.შ.)
• ფილტვის განვითარების თანდაყოლილი ანომალიები და ინტერსტიციული დაავადებები;
• ფილტვის რღვევითი და პლევრული გართულებებით მიმდინარე პნევმონიები;
• ნერვ-კუნთოვანი პათოლოგიების ფონზე მიმდინარე ფილტვის დაავადებები;
• ტუბერკულოზის ადრეული გამოკვლევა/მართვა;
• ალერგიული დაავადებები (ასთმა, ალერგიული რინიტი) და მრავალი სხვა.
მკურნალობის სრული სპექტრია ხელმისაწვდომი აბდომინური მიმართულებითაც და პროცესში ჩართულია მულტიდისციპლინური (ინფექციონისტი, გასტროენტეროლოგი, ენდოსკოპისტი, ალერგოლოგი, პედიატრი) გუნდი. ხორციელდება ისეთი დაავადებების მკურნალობა, როგორიცაა:
• კუჭ-ნაწლავის სისტემის პათოლოგიები;
• ღვიძლის უკმარისობა;
• ღვიძლის და სანაღვლე გზების მწვავე და ქრონიკული პათოლოგიები;
• პანკრეასის თანდაყოლილი/შეძენილი დაავადებები,
• წყლულოვანი ენტეროკოლიტები, ცელიაკია, ნუტრიციული დარღვევები და სხვა;
ორთოპედია-ტრავმატოლოგიისა და ხერხემლის ქირურგიის განყოფილება სპეციალიზებულ სერვისებს მოიცავს და მიმართულია საყრდენ-მამოძრავებელი სისტემისა და კუნთოვანი ქსოვილების ტრავმული დაზიანებებისა თუ დაავადების სამკურნალოდ. 0-დან 18 წლამდე პედიატრიულ პაციენტებს გუნდი 24 საათის განმავლობაში აწვდის მომსახურებას.
მაღალი სირთულის ოპერაციები, ძირითადად, მინი ინვაზიური მეთოდით ტარდება და მოიცავს მსოფლიოში აპრობირებულ MIPO ტექნიკას, რაც მოტეხილი ძვლების სტაბილიზაციისთვის სპეციალური ფირფიტის შეყვანას მინიმალური განაკვეთით გულისხმობს. თანამედროვე მიდგომას წარმოადგენს ასევე ტიტანის ელასტიური ღეროების გამოყენება.
განყოფილებაში წარმატებით ხორციელდება მენჯ-ბარძაყის სახსრისა და ძვალ-კუნთოვანი სისტემის თანდაყოლილი და შეძენილი დეფორმაციების ოპერაციული მკურნალობა, სახსრების კონრაქტურის საკორექციო პროცედურები, კიდურების თანდაყოლილი და შეძენილი დეფორმაციებისა თუ არათანაბარი სიგრძის კორექცია, მყესების დაგრძელება-დამოკლების მანიპულაციები, საყრდენ-მამოძრავებელი სისტემის კეთილთვისებიანი სიმსივნეების ქირურგია, სხვადასხვა ტრავმული დაზიანების და დეფორმაციის კორექცია და სხვა.
აღსანიშნავია ასევე ხერხემლის ქირურგიის წარმატების მაჩვენებელი იაშვილის ბავშვთა საავადმყოფოში. ხორციელდება ხერხემლის ყველა სახის დეფორმაციისა თუ პათოლოგიის ოპერაციული და კონსერვატიული მკურნალობა. ფართოდ გავრცელებულ დაავადებებს შორის აღსანიშნავია სხვადასხვა სახის სქოლიოზის, კიფოზის, მალთაშუა დისკის თიაქრების, კისერმრუდობის, ნეკნოვანი კუზის, არამდგრადი ხერხემლისა და კუდუსუნის დეფორმაციების მკურნალობა.
ყბა-სახის ქირურგიის განყოფილება პედიატრიულ პაციენტებს სერვისების სრულ სპექტრს სთავაზობს. ხელმისაწვდომია სრულფასოვანი ამბულატორიული სერვისი და დღე-ღამის სტაციონარი. განყოფილებაში პირის ღრუს და ყბა-სახის მიდამოს გადაუდებელი და გეგმური ქირურგიული მკურნალობა წარმატებით ხორციელდება. ოპერაციები კეთდება როგორც ტრადიციული მეთოდით, ასევე - პირს შიდა მიდგომით, რაც პოსტოპერაციული ნაწიბურებისა და ნაკერების არსებობას გამორიცხავს.
უფრო კონკრეტულად, ხორციელდება:
• ყბის განვითარების თანდაყოლილი/შეძენილი ანომალიების ქირურგიული მკურნალობა;
• სამწვერა ნერვის და სახის ნერვების პათოლოგიათა ოპერაციული მკურნალობა;
• ყბა-სახის მიდამოს ქირურგიული ინფექციების ქირურგია;
• პირის ღრუსა და ყბა-სახის მიდამოს სიმსივნეების ქირურგია;
• ყბა-სახის მიდამოს პოსტტრავმული დეფორმაციების რეკონსტრუქციული ოპერაციები;
• სანერწყვე ჯირკვლების დაავადებების ქირურგიული მკურნალობა;
• საფეთქელ-ქვედა ყბის სახსრის დაავადებების ოპერაციული მკურნალობა;
• პოსტოპერაციული ნაწიბურების ქირურგიული კორექცია/პლასტიკა;
• ასაკობრივი, რეტენციული კბილების (ეშვები და მე-8 კბილები) მკურნალობა;
• ყბა-სახის მიდამოს ანთებითი დაავადებების (ფლეგმონები, აბსცესები, პერიოსტიტები) მკურნალობა და სხვა;
ყბა-სახის ქირურგიის განყოფილება 24 საათის განმავლობაშია ხელმისაწვდომი და პაციენტებს სრულფასოვან გადაუდებელ სამედიცინო დახმარებას აწვდის.
ოტორინოლარინგოლოგიის განყოფილება ყელ-ყურ-ცხვირის დაავადებების სრულფასოვან დიაგნოსტიკა-მკურნალობას მოიცავს, რაც სინუსური დარღვევების, სმენის დაქვეითებისა და ფარინგეალური პათოლოგიების ამბულატორიულ/სტაციონარულ მართვას გულისხმობს.
პედიატრიულ პაციენტებში სხვადასხვა ფაქტორით გამოწვეული ყელ-ყურ-ცხვირის არაერთი პათოლოგიაა გავრცელებული. მათ შორის, შუა ყურის მწვავე ანტება (ოტიტი), ალერგიული რინიტი, ტონზილიტი და ადენოიტი, კოგნიტური ანომალიები, ქრონიკული სინუსიტი, ძილის, მეტყველების და ენის დარღვევები. ასევე, ხშირია უცხო სხეულის მოხვედრის ფაქტორები ყელის, ყურისა და ცხვირის არეში ისევე, როგორც - ტრავმული დაზიანებები.
ოტორინოლარინგოლოგიის განყოფილება ამ მხრივ სრულფასოვან მომსახურებას უზრუნველყოფს. წარმატებით ტარდება ქირურგიული ჩარევები ყელ-ყურ-ცხვირის მიდამოებში. მათ შორის, ხორციელდება ადენოტომია, ტონზილექტომია, სეპტოპლასტიკა, სისხლმდენი კაპილარის მოწვა, რეტრო და პარაფირენგეალური აბსცესების გახსნა, უცხო სხეულების ამოღება და მრავალი სხვა.
გუნდი დაკომპლექტებულია დასავლური გამოცდილების მაღალკვალიფიციური ექიმებით. განყოფილებას ვლადიმერ კვაჭანტირაძე ხელმძღვანელობს.
ზოგადი, აბდომინური და თორაკალური ქირურგიის განყოფილება მოიცავს სპეციალიზებული სერვისების ფართო სპექტრს, რომელიც სხვადასხვა ქირურგიული საჭიროების მქონე ნებისმიერი ასაკის (0-დან 18 წლამდე) პედიატრიულ პაციენტს სრულფასოვან მომსახურებას სთავაზობს.
იაშვილის ბავშვთა საავადმყოფო მართავს ყველაზე მძიმე ქირურგიულ პათოლოგიებსა და განვითარების მანკებს ახალშობილებში. წარმატებით ხორციელდება მაღალი სირთულის ოპერაციული მკურნალობა, მათ შორის - თანდაყოლილი ანომალიებისა და სიმსივნეების ქირურგია.
ზოგადი და აბდომინური ქირურგიის მიმართულებით ხელმისაწვდომია ყველა სახის ოპერაციული ჩარევა ახალშობილებში, ბავშვებსა და მოზარდებში. წარმატებით ტარდება ოპერაციები ნაღვლის ბუშტზე (ქოლეცისტექტომია, „კასაის“ ოპერაცია, სანაღვლე გზების პათოლოგიების მკურნალობა, სანაღვლე სადინრების აღდგენა და სხვა), ღვიძლსა და პანკრეასზე. ხორციელდება თორმეტგოჯა ნაწლავის ქირურგია გამავლობის სრულფასოვანი აღდგენით, ჰირშპრუნგის დაავადების მკურნალობა ტრანსანალური მიდგომით, მსხვილი და წვრილი ნაწლავის პათოლოგიების ოპერაციული მკურნალობა. ასევე, ხელმისაწვდომია აპენდექტომია (ბრმა-ნაწლავის ამოკვეთა), გასტრექტომია (კუჭის ნაწილობრივი ან მთლიანი რეზექცია), პროქტოლოგიური ოპერაციები, სხვადასხვა გენეზის პორტული ჰიპერტენზიების ქირურგია და ისეთი იშვიათი პათოლოგიების მკურნალობა, როგორიცაა - ხმელთაშუა ზღვის ცხელება, გლუტეინის დაავადება (ცელიაკია), არასპეციფიური წყლულოვანი კოლიტი.
თორაკალური ქირურგიის მიმართულებით ახალშობილებში, ბავშვებსა და მოზარდებში ყველა სახის თორაკალური ოპერაცია ტარდება. მათ შორის, ხელმისაწვდომია სასუნთქი გზებისა და გულ-მკერდის ღრუს ორგანოების თანდაყოლილი ანომალიების, შეძენილი დაავადებებისა და ტრავმული დაზიანებების ქირურგიული მკურნალობა. უფრო კონკრეტულად, წარმატებით ხორციელდება ტრაქეის ქირურგია, დიაფრაგმის თიაქრების, ფილტვის თანდაყოლილი ატრეზიების, ფილტვისა და საყლაპავის ანომალიების, გულ-მკერდის დეფორმაციებისა და სიმსივნეების ოპერაციული მკურნალობა.
ოპერაციები ტარდება როგორც ტრადიციული მეთოდით, ასევე - თანამედროვე მიდგომებით, რომელიც მინიინვაზიურ განაკვეთს, გართულებების მინიმუმამდე დაყვანილ რისკს და გამარტივებულ პოსტოპერაციულ პერიოდს გულისხმობს.
პედიატრიული ონკოლოგიისა და ონკოჰემატოლოგიის მიმართულებით იაშვილის ბავშვთა საავადმყოფო ერთადერთი ჰოსპიტალია ქვეყანაში, რომელიც 0-დან 18 წლამდე პაციენტებს სტაციონარულ სერვისს სთავაზობს. ხორციელდება ყველა სახის სოლიდური სიმსივნის მკურნალობა და პროცესში, ქვეყნის წამყვან ქართველ სპეციალისტებთან ერთად, საჭიროებისამებრ, დასავლელი ექიმების გუნდია ჩართული.
განყოფილების მთავარ პრიორიტეტს მულტიდისციპლინური მიდგომა წარმოადგენს. თითოეული პაციენტის შემთხვევა განიხილება კონსილიუმის ფორმატში და მასში ჩართულია კლინიკური ონკოლოგების, სხივური ონკოლოგების, ქიმიოთერაპევტების, ჰემატოლოგების, ქირურგების, რადიოლოგებისა და პათანატომების გუნდი. სტაციონარული დიაგნოსტიკური მიმართულებით ხელისავწდომია:
• ბლასტური უჯრედების იმუნოფენოტიპირება (უახლესი თაობის გამდინარე ციტომეტრით);
• ძვლის ტვინის ფუნქცია და ტრეპანობიოფსია;
• ციტომორფოლოგიური და ციტოქიმიური კვლევები;
• მოლეკულური და გენეტიკური კვლევა (PCR-მეთოდით);
• მინიმალური რეზიდუალური დაავადების დეტექცია (MRD);
განყოფილება მოიცავს პედიატრიული ონკოლოგიური მომსახურების სრულ სპექტრს. მათ შორისაა:
• კლინიკური ონკოლოგიის სერვისები (ქიმიოთერაპია, იმუნოთერაპია, ტარგეტული თერაპია, ჰორმონოთერაპია);
• რადიაციული ონკოლოგია - სხვადასხვა ტიპის რადიაციული დასხივება სიმსივნური უჯრედების ზრდის შეჩერებისა და ჯანსაღი უჯრედების ნორმალური ფუნქციონირების ჩვენებით;
• ონკოქირურგია - ოპერაციული მკურნალობა ავთვისებიანი და ზოგიერთი კეთილთვისებიანი სიმსივნის შემთხვევაში;
1995 წლიდან დღემდე, განყოფილებაში ევროპაში აღიარებული BFM პროტოკოლის სრული დაცვით ხორციელდება მწვავე ლეიკემიის მკურნალობა, რაც პაციენტთა 70%-ში ზრდის სრული გამოჯანმრთელების შანსს. ლეიკემიით დაავადებული ყველა პაციენტი ორწლიან დისპანსერულ მკურნალობას (დაცვითი თერაპია) სრულიად უსასყიდლოდ იღებს.
იაშვილის ბავშვთა ცენტრალური საავადმყოფოს ნეირომეცნიერების დეპარტამენტი ერთადერთია ქვეყანაში, სადაც 0-დან 18 წლამდე პედიატრიულ პაციენტებში ყველა სახის ნევროლოგიური და ნეიროქირურგიული პათოლოგიის სრულფასოვანი გამოკვლევა და მკურნალობა-მართვა ხორციელდება.
განყოფილება აღჭურვილია სრულყოფილი სადიაგნოსტიკო საშუალებებით, მათ შორის - ელექტროფიზიოლოგიური, ელექტროენცეფალოგრაფიული და ელექტრომიოგრაფიული აპარატურით. კლინიკაში ხელმისაწვდომია ასევე კომპიუტერული ტომოგრაფია.
ხორციელდება ურთულესი ოპერაციები თავისა და ზურგის ტვინის განვითარების მანკების, სიმსივნეების, სისხლძარღვოვანი მალფორმაციებისა და ტრავმული დაზიანებების დროს. წარმატებით მიმდინარეობს ხერხემლის ნევროლოგიური დაავადებების, თავის, ზურგის ტვინის და პერიფერიული ნერვული სისტემის ონკოლოგიური პათოლოგიების ქირურგიული მკურნალობა.
ნეიროქირურგიული ოპერაციების ფართო სპექტრი ენდოსკოპიური და ნეიროფიზიოლოგიური მონიტორინგით ხორციელდება. მათ შორისაა შუნტთან დაკავშირებული ქირურგიული ჩარევები (შუნტის რევიზია/რეკონსტრუქცია, კისტოპერიტონიალური შუნტირება და სხვა), რეპოზიცია და რეკონსტრუქცია ქალას ტრავმის დროს, კრანიოპლასტიკა, ოპერაციები ზურგის ტვინისა და ნერვების ფესვებზე, ქალასშიდა დაზიანების ექსტრიპაცია, ენცეფალოცელეს, მიელოცელესა და მენინგოცელეს ამოკვეთა და სხვა.
ნეირომეცნიერების დეპარტამენტში ფუნქციონირებს ასევე ეპილეფსიის დიაგნოსტიკისა და ზედამხედველობის პროგრამა, რომელიც საქართველოს ნებისმიერი მოქალაქისთვის არის ხელმისაწვდომი და გულისხმობს უფასო კვლევასა და შეფასებას როგორც ეპილეფსიის ეჭვის, ასევე - უკვე დადასტურებულ შემთხვევებში.
აღსანიშნავია ისიც, რომ კრანიოსინოსტოზების ქირურგიული მკურნალობის მეთოდი საქართველოში პირველად სწორედ იაშვილის ბავშვთა ცენტრალური საავადმყოფოს ნეირომეცნიერების განყოფილებაში დაინერგა.
წარმოდგენილი სერვისების მრავალფეროვნებას ქვეყნის წამყვან პროფესიონალთა გუნდი განაპირობებს. ნეირომეცნიერების დეპარტამენტს მედიცინის მეცნიერებათა დოქტორი, პროფესორი ნანა ტატიშვილი ხელმძღვანელობს. ურთულესი ნეიროქირურგიული ოპერაციები ბავშვებში კი ტარდება მედიცინის დოქტორის, ვლადიმერ წიქარიშვილის ხელმძღვანელობით.
იაშვილის ბავშვთა ცენტრალური საავადმყოფოს საოპერაციო ბლოკი უახლესი და თანამედროვე სამედიცინო ტექნიკით არის აღჭურვილი და პედიატრიულ პაციენტებზე ზრუნვის უმაღლეს სტანდარტებზეა მორგებული. მოიცავს მაღალი გარჩევადობის ვიზუალიზაციის სისტემებს, მინიინვაზიური თუ ტრადიციული ქირურგიული ჩარევებისთვის საჭირო ინსტრუმენტებსა და პედიატრიული მოვლისთვის მორგებულ სპეციალიზებულ საანესთეზიო აღჭურვილობას.
უფრო კონკრეტულად, საოპერაციო ბლოკი მოიცავს საანესთეზიო მანქანას და პაციენტის მონიტორს, რომელზეც ყველა ის სასიცოცხლო პარამეტრია გამოტანილი, რაც ამერიკის ანესთეზიოლოგთა ასოციაციის მიერ არის რეკომენდებული. ეს ყოველივე ანესთეზიოლოგებსა და ქირურგებს საშუალებას აძლევს, ქირურგიული ჩარევები უსაფრთხოდ, გართულებების გარეშე, დასავლური სტანდარტების დაცვით ჩატარდეს.
ქირურგიული მიმართულებით იაშვილის ბავშვთა ჰოსპიტალში ტარდება ნეიროქირურგიული, ენდოვასკულური, უროლოგიური, ზოგადქირურგიული, თორაკოქირურგიული, ტრავმატოლოგიური ოპერაციები და მრავალი სხვა. გუნდი დაკომპლექტებულია ქვეყნის წამყვანი პროფესიონალებით, მათ შორის - სხვადასხვა მიმართულების ქირურგებითა და პედიატრიულ ანესთეზიოლოგთა მაღალკვალიფიციური სპეციალისტებით.
ჰოსპიტალური განყოფილება, რომელიც მაღალკვალიფიციური უროლოგების, ნეფროლოგების, რევმატოლოგებისა და ტოქსიკოლოგების გუნდით არის დაკომპლექტებული, 0-დან 18 წლამდე პედიატრიულ პაციენტებს მრავალპროფილურ და სპეციალიზებულ სტაციონარულ მოვლას ჰპირდება.
ნეფროლოგიის მიმართულებით თირკმლის დაავადებების მკურნალობა მულტიდისციპლინური მეთოდით ხდება. წარმატებით ხორციელდება თირკმლის მწვავე უკმარისობის, თირკმლის ქრონიკული პათოლოგიების, ნეფროზული სინდრომის, ორგანოს მწვავე დაზიანებისა და განვითარების მანკების ოპერაციული მკურნალობა. ასევე, იაშვილის ბავშვთა კლინიკაში თირკმლის მწვავე უკმარისობის მქონე პედიატრიული პაციენტებისთვის ხელმისაწვდომია დიალიზი.
უროლოგიური მიმართულებით პედიატრიულ ასაკში ყველა სახის უროლოგიური ოპერაციაა ხელმისაწვდომი. ქირურგიული პროცედურები, საჭიროებისამებრ, ღია და ენდოსკოპიური მეთოდით ხორციელდება. ლაპარასკოპიულად ტარდება ზედა საშარდე გზების და სასქესო სისტემის თანდაყოლილი პათოლოგიების (ჰიდროცელე, ვარიკოცელე, საზარდულის არხის თიაქარი, ჩამოუსვლელი სათესლე ჯირკვალი და სხვა) მკურნალობა. ხელმისაწვდომია ასევე შარდსადენი მილის განვითარების თანდაყოლილი მანკის (ჰიპოსტადია) ოპერაციული კორეგირება. გარდა ამისა, ღია ოპერაციული წესით ხორციელდება ისეთი რთული უროლოგიური დაავადებების მკურნალობა, როგორიცაა ჰიდრონეფროზი, შარდის ბუშტის ექსტროფია, ბუშტ-შარდსაწვეთის სეგმენტის ობსტრუქციული პათოლოგიები, თანდაყოლილი რეფლუქსუროპათია და სხვა.
იაშვილის ბავშვთა საავადმყოფოში რევმატოლოგიის მიმართულებით სხვადასხვა სისტემური დაავადების მკურნალობა უახლესი ტექნოლოგიებითა და საერთაშორისო გაიდლაინებით ხორციელდება. ხელმისავწდომია შემაერთებელი ქსოვილებისა და ძვალ-სახსროვანი სისტემების ისეთი პათოლოგიების მკურნალობა, როგორიცაა იუვენილური რევმატოიდული ართრიტები (სისტემური, ოლიგოარტიკულური, პოლიარტიკულური), ვასკულიტები (კავასაკის დაავადება, ბეხჩეტის დაავადება, ვეგენერის გრანულომატოზი, ტაკაიასუს არტერიტი), სისტემური წითელი მგლურა, მწვავე რევმატიული ცხელება, იუვენილური დერმატომიოზიტი, შოგრენის სინდრომი, პერიოდული ცხელების სინდრომი (FMF ,PFAPA) და მრავალი სხვა.
რაც შეეხება ტოქსიკოლოგიას, ამ კუთხით იაშვილის ბავშვთა ჰოსპიტალში ტოქსიკური აგენტების ზემოქმედების შედეგად განვითარებული მწვავე ინტოქსიკაციების მკურნალობა წარმატებით ხორციელდება. განყოფილება ერთადერთია ქვეყანაში, რომელიც ამ პროფილით პედიატრიულ პაციენტებს სრულფასოვან მომსახურებას სთავაზობს. ხელმისაწვდომია ისეთი შემთხვევების მართვა, როგორიცაა მედიკამენტური ინტოქსიკაციები, კოროზიული ინტოქსიკაციები, ქიმიური ნივთიერებებით მოწამვლა, მძიმე მეტალების, პესტიციდების, მავნე აირების, მხუთავი აირისა და ბიოლოგიური შხამების (მცენარეული, ცხოველური) შედეგად გამოწვეული ინტოქსიკაციები.
ფილტვის ცენტრი ფილტვის სხვადასხვა პათოლოგიის დიაგნოსტიკას, მკურნალობასა და მართვას ემსახურება. მულტიდისციპლინური გუნდის ჩართულობა უზრუნველყოფს პერსონალიზებულ ამბულატორიულ სერვისს 0-დან 18 წლამდე იმ პაციენტებისთვის, რომელთაც სასუნთქი სისტემის თანდაყოლილი, შეძენილი, ალერგიული და იშვიათი პათოლოგიების, ასევე - ტუბერკულოზისა და გულმკერდის ღრუს ორგანოთა დაავადებების კუთხით სპეციალიზებული მომსახურების მიღება ესაჭიროებათ. მკურნალობის პროცესში სხვადასხვა დარგის სპეციალისტია (პედიატრი, ბავშვთა პულმონოლოგი, ფტიზიატრი, ალერგოლოგი, ბავშვთა ქირურგი, ენდოსკოპისტი, რადიოლოგი) ჩართული.
წარმატებით იმართება ფილტვის რღვევით, პლევრული გართულებებითა და სუნთქვის მწვავე უკმარისობით მიმდინარე დაავადებები, მწვავე რესპირაციული ინფექციები (მწვავე ბრონქიტი, კრუპი, ბრონქიოლიტი), ფილტვის ქრონიკული დაავადებები (კისტური ფიბროზი, ინტერსიციული პლევმონია, ბრონქული ასთმა) და ნერვ-კუნთოვანი გართულებების ფონზე მიმდინარე პულმონური პათოლოგიები. ასევე, ცენტრში ხელმისაწვდომია ტუბერკულოზზე საეჭვო შემთხვევების დიფერენციული დიაგნოსტიკა.
სასუნთქი სისტემის დიაგნოსტიკური მიმართულებით ინსტრუმენტული და ლაბორატორიული კვლევების სრული სპექტრია ხელმისაწვდომი. ტარდება მაღალტექნოლოგიური და სპეციფიკური გამოკვლევები. მათ შორის:
• სპირომეტრია - გარეგანი სუნთქვის ფუნქციის კვლევა;
• ბაზისური ალერგიული სინჯები;
• კომპიუტერული ტომოგრაფია;
• რენტგენოლოგიური კვლევა;
• გულ-მკერდის ექოსკოპიური კვლევა;
• ენდოსკოპიური დიაგნოსტიკა, მათ შორის - ბრონქოსკოპია;
• მსტვინავი სუნთქვის ადრეული დიაგნოსტიკა WheezeScan-ის აპარატით;
• სასუნთქი სისტემის მწვავე დაავადებების ვირუსული გამომწვევების სრული პანელის შესწავლა ლუგარის ლაბორატორიის ბაზაზე;
• ლაბორატორიული კვლევები, მათ შორის - ბაქტერიული, ბიოქიმიური და იმუნოლოგიური გამოკვლევა;
